Buot árbevierut leat báikkálaččat
Nationála lávdin álbmotmusihka, luođi ja álbmotdánssa várás, Riksscena ovdanbuktá árbevierud stuora girjáivuođa. Prográmma fátmmasta rikkis ja earenoamáš álbmotmusihka girjáivuođa Norggas ja árbevirolaškultuvrra miehtá máilmmi.
Norggas lea stuora girjáivuohta earenoamáš álbmotmusihkaárbevieruin ja báikkálaš dánsaárbevieruin, maid báikkálaš árbeguoddit dollet eallin miehtá riikka – sihke go okto čuojahit ja earáiguin fárrolaga, ja go gilvalit čuojahandoaluin ja go čuojahit dánsadoaluin.
Sihke lávlun álbmotmusihkas ja árbevirolaš čuojaheapmi hardingfiolain ja dábálaš fiolain lea dál nu nanus go goassege ovdal, ja beroštupmi ovddeš álbmotmusihkačuojanasaide, nugo njálbmehárpui, langeleikii, čoarvedorvii ja luvrui, lassána.
Riksscenas mii ovdanbuktit árbevirolaš álbmotmusihka máŋggalágan hámis:
Prográmmaráiddus Fyrispel lea akustalaš soloárbevierru guovddážis.
Norge Rundt-ráiddus čiekŋudit báikkálaččat fáddávahkoloahpain, mas leat konsearttat ja dánsun. Prográmma ráhkaduvvo fárrolaga guovllu árbeguddiiguin. Mii lágidit maiddái máŋga árbevirolaš čuojahangilvvuid.
Riksscena dánsafesttat šaddet dađistaga eanet. Dáppe leat lotnolasat báikkálaš árbevirolaš dánsat ja jorbodatdánssat, okto čuojaheapmi ja joavkočuojaheapmi buot sáliin viesus – ja dánsalávddis lea dievva!
Tuvas Blodklubb lea dolvon árbevirolaš čuojaheami ođđa guldalanjoavkkuide ja čohkke juohke mánu čuđiid mielde olbmuid buot agiin.
Talentaprográmmas Folk Sessions bargat lahka ođđa čuojahan- ja lávlunjienaiguin iešguđet árbevirolaš surggiin, omd. Folk Sessions Gamaldans ja Folk Sessions Vokal áŋgiruššamiin.
Nationála lávdin luođi váras lokte Riksscena prográmma sámi musihka – ovdanbuktin mii maŋemus jagiid lea ovdánan sakka.
Riksscena sámi prográmmas lea stuorra girjáivuohta, árbevirolaš juoigamis gitta stuora lávdečájálmasaide, ođđabuvttaduvvon ávvukonsearttaide, šáŋŋerrasttideaddji prošeavttaide, mánáidčájálmasaide, bánddaide ja klubbaeahkediidda. Iešguđet árbevierut miehtá Sámi leat lunddolaš oassin min prográmmas.
Dál go sámi musihkka ovdána sakka, lea mis erenoamáš ovddasvástádus ovddidit árbevirolaš luođi. Juohke áigodaga ovdanbuktit akustalaš solojuoigama prográmmaráiddus Fyrispel. Juoigiid Searvi lea okta min vuođđudanservviin ja kuráhtor dán prográmmas.
Klubba-konseapta Idja lea máŋgga jagi leamaš ovttasbargu sámi nuoraidorganisašuvnnain Oslove Noereh.
Sámi álbmotbeaivvi oktavuođas leat máŋgga jagi buvttadan stuorra ávvukonsearttaid, muhto sámi prográmma gávnnat Riksscenas miehtá jagi.
Meahccesuopmelaččat ja kvenat, romaniálbmot, romalaččat ja juvddálaččat ovddastit dehálaš árbevierrosurggiid mat leat leamaš Norggas čuđiid jagiid mielde, muhto mat leat leamaš unnán oidnosis almmolaš kultureallimis.
Riksscena bargá erenoamážit nannet nationála unnitloguid kulturárbbi gaskkusteami. Maŋimuš jagiid leat ásahan oktavuođa máŋgga doaimmaheaddjiin ja fágabirrasiin iešguđet unnitlohkojoavkkuin, ja ovddidan áŋgiruššamiid dialogas singuin:
Meahccesuopmelaččaid Tolvmannadagen, Kvenaálbmoga beaivi, Romalaččaid beaivi ja Mátkkošteaddjiid beaivi ávvuduvvojit kulturdoaluiguin Riksscenas. Talentaprográmmas Folk Sessions leat álggahan kvena ja meahccesuopmelaččaid áŋgiruššamiid, ja maiddái romani/mátkkošteaddjiid áŋgiruššama.
2025 ráhkadeimmet raportta «Nasjonale minoriteter i Norge: Musikk, dans og identitet – Kulturarv i fare» diehtovuođđun min bargui ja Ráđđehusa NOU-čielggadeapmái «Musikklandet. Flerstemt musikkpolitikk for fremtiden».
Norgga musihkka- ja dánsasuorggis lea stuorra girjáivuohta báikkálaš árbeguddiin geat bohtet miehtá máilmmi ja geain lea lunddolaš sadji Riksscena prográmmas.
Norgga musihkka- ja dánsunsuorggis lea stuora girjáivuohta báikkálaš árbeguddiin geat bohtet miehtá máilmmi ja geain lea lunddolaš sadji Riksscena prográmmas. Jagi 2025 ledje čuojaheaddjit ja árbevierut eanet go 33 riikkas min prográmmas – sihke riikkaidgaskasaš artisttat ja Norggas ássi čuojaheaddjit.
Minifestiválaid ja prográmmaráiddui bokte bidjat fokusa dihto árbevirolaš surggiide. Bargat ovttas máŋgga organisašuvnnaiguin, festiválaiguin, birrasiiguin ja olgguldas kuráhtoriiguin geain lea máhttu iešguđet máilmmi árbevieruin ja ulbmiljoavkkuin, nugo Masahat, Oslo World, Oslo Oriental Orchestra, Somali Week Oslo, Transform ja Oslo Caribbean Festival.
Samspill International Music Network lea okta Riksscena vuođđudeddjiin ja dehálaš ovttasbargoguoibmi dán buvttadan- ja prográmmabarggus.
